Ceiliúradh Merriman i 2005

Scoil Gheimridh Chumann Merriman

28 – 30 Eanáir

Seo an 37ú Scoil Gheimhridh as a chéile agus thionóladh í i mBun Raite, Co. an Chláir, 28 – 30 Eanáir. Brian Merriman 1805 – 2005 an téama agus do b'é Liam Ó Dochartaigh, Ollscoil Luimnigh, a stiúir. I measc na n‑imeachtaí bhí léamh de théacs iomlán Cúirt an Mheán Oíche (1,026 líne), a cumadh sa bhliain 1780. B'iad Eoghan Ó hAnluain, Áine Uí Cheallaigh, Audrey Ní Fhearghail, Alan Titley agus Doireann Ní Bhriain na léitheoirí, agus b'é Darach Mac Con Iomaire (Taibhdhearc na Gaillimhe) an léiritheoir.

Cumann Merriman agus ‘Cúirt’

19 – 24 Aibreán

Chuaigh Cumann Merriman i gcomhar le Cúirt, an Fhéile Idirnáisiúnta Litríochta, i nGaillimh, 19 – 24 Aibreán. Tá coimisiún tugtha ag an bhFhéile Litríochta do Chiarán Carson as Béal Feirste aistriúchán nua de Cúirt an Mheán Oíche a dhéanamh le urraíocht ó Chumann Merriman. Tá súil go gcuirfidh Galway Youth Theatre leagan stáitse den téacs nua i láthair le linn fhéile Chúirt na Gaillimhe i mbliana. Tá tuilleadh faisnéise ar fáil ag an Galway Arts Centre.

Cumann Merriman agus Cumann Éire san Ochtú Céad Déag

9 – 12 Meitheamh

Beidh Cumann Merriman ag dul i gcomhar le Cumann Éire san Ochtú Céad Déag i reachtáil comhdhála acadúil dar teideal Brian Merriman i gComhthéacs na hEorpa, in Ollscoil Luimnigh, 9 – 12 Meitheamh. I measc na rannpháirtithe, beidh Joop Leerssen (Ollscoil Amsterdam), Liam P. Ó Murchú (Coláiste na hOllscoile Corcaigh), Kevin Whelan (Ollscoil Notre Dame) agus Micheál Ó Suilleabháin (Ollscoil Luimnigh). beidh turas faoi threoir go dtí An Fhiacail i gcontae an Chláir mar chuid de chlár na comhdhála. Tá tuilleadh faisnéise ar fáil ar láithrean an ECIS.

27 Iúil i Luimneach

27ú Iúil

Beidh Craobh Luimnigh de Chonradh na Gaeilge, i gcomhar le Cumann Merriman, ag ceiliúradh Bhrian Merriman ar chothrom an lae ar éag sé i gCathair Luimnigh. Cuirfear tús leis an ócáid ag Oifig an Mhéara in Oifigí na Cathrach ag 10.45. Ina dhiaidh sin treoróidh Prionsias de Priondragás turas siúlóide ar ha hionaid i Luimneach a raibh baint ag Merriman leo. Léifear míreanna as Cúirt an Mheán Oíche ag Sean‑Sráid an Chláir. Cuirfidh an Canónach Mícheál Liostún filíocht agus amhráin i láthair ag Sráid Mhingarait, mar a raibh scoil ag an bhfile Seán Ó Tuama an Ghrinn. Mar chlabhsúr, beidh fáiltiú ar bun sa Chistin, Halla Íde, ag 18 Sráid Thomáis. Tá cuntas ar an lá seo ar fáil ar an leathanach seo.

Scoil Samhraidh Chumann Merriman

20 – 27 Lúnasa

Seo an 38ú Scoil Samhraidh. I Lios Dúin Bhearna, Co. an Chláir, a bheidh sí, idir 20 – 27 Lúnasa. Brian Merriman 1805 – 2005 — ceiliúradh téama na Scoile, agus beidh sraith de sheimineáir ar théacs Cúirt an Mheán Oíche le Liam P. Ó Murchú mar chuid den chlár chomh maith le léachtaí ar théamaí a phléitear sa Chúirt ag léachtóirí aitheanta. Beidh béim faoi leith ar fhilíocht chomhaimseartha sa dá theanga, Gaeilge agus Béarla, i rith na Scoile seo, leis. Is é Bob Collins, iar‑Phríomhstiúrthóir RTÉ, stiúrthóir na Scoile, lena bhfuiltear ag tnúth go mór.

Cumann Merriman agus Coláiste na hOllscoile, Corcaigh

23ú Meán Fhómhair

Beidh Cumann Merriman ag dul i gcomhar le Ranna Gaeilge Choláiste na hOllscoile, Corcaigh i reachtáil ceardlann lae do mhic léinn iarchéime Dé hAoine 23 Meán Fómhair. Is é Traidisiún Lámhscríbhinní na hÉireann téama na ceardlainne. Beidh sé ar siúl i Seomra G.01, Áras Uí Rathaille, Coláiste na hOllscoile, Corcaigh. Is iad Pádraig Ó Riain, Liam P. Ó Murchú, Séan Ó Duinnshléibhe is Caitríona Ó Dochartaigh na léachtóirí. Tá tuilleadh eolais ar fáil ach teagmháil a dhéanamh le Caitríona Ó Dochartaigh ar 00 353 21 490 3357.

Cumann Merriman agus Institiúid Ardléinn Bhaile Átha Cliath

1ad Nollaig

Cuirfear clabhsúr ar chlár comórtha Chumann Merriman le léacht phoiblí atá á reachtáil i gcomhar le Scoil an Léinn Cheiltigh d’Institiúid Ard-Léinn Bhaile Átha Cliath ar 1 Nollaig. Labhróidh Liam P. Ó Murchú ar lámhscríbhinn Mherriman féin atá ar coimeád i Leabharlann na hOllscoile i gCambridge. B'é Liam P. Ó Murchú a d’fhoilsigh an t‑eagrán deifnídeach de Cúirt an Mheán Oíche in 1982, agus déanfar an t‑eagrán seo a cheangal le aistí nua ar an bhfile agus ar a mhórshaothar leis an scoláire céanna do Leabhar na Bliana 2005 ag Cumann Merriman. Tá tuilleadh faisnéise ar fáil ar Scoil an Léinn Cheiltigh ar a láithreán féin.